Рӯзҳои 5-7 декабри соли 2024 дар шаҳри Москваи Федератсияи Россия Форуми байналмилалии саҳми шаҳрвандӣ “МО БО ҲАМ” (#МЫВМЕСТЕ) баргузор гардид, ки дар он намояндагони Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Иттифоқи ҷавонони Тоҷикистон ва ҷомеаи шаҳрвандӣ иштирок ва Тоҷикистонро намояндагӣ намуданд.
5 декабр дар Рӯзи байналмилалии волонтёрон маросими кушодашавии Форум дар толори марказии намоишӣ “Манеж”-и шаҳри Москва дар сатҳи баланди ташкилӣ ва фарҳангӣ бо иштироки Президенти Федератсияи Россия Владимир Путин ва намояндагони 40 давлати дунё баргузор гардид.
Президенти Федератсияи Россия Владимир Путин дар оғоз ба муносибати Рӯзи байналмилалии волонтёрон ҳамаи иштирокдорони Форумро табрик гуфта, доир ба нақш ва саҳми ҷавонону волонтёрон дар пешрафти ҷомеа ва давлатҳо ибрози андеша намуд. Дар идомаи суханронии худ Владимир Путин таҳкими робитаҳои дӯстию ҳамкорӣ дар миёни ҷавонони давлатҳои ҷаҳон ва ба сатҳи нав баровардани дастгирии фаъолияти волонтёриро, аз он ҷумла, дар миқёси кишварҳои аъзои Иттиҳоди давлатҳои мустақил муҳим ва зарурӣ арзёбӣ намуд.
6 декабр дар Муҳокимаи панелӣ “Купруки дӯстӣ: Платформаи ягонаи арзишҳои анъанавӣ” иштирокдорон кишварҳои худро муаррифӣ намуданд. Дар ин чорабинӣ Ҷумҳурии Тоҷикистон ва дастовардҳои он дар шакли видеоролик ба аҳли толор ба намоиш гузошта шуд ва иштирокчиёни Форум бо табиати нотакрори диёр, фарҳанги волои ниёгон, арзишҳои милливу суннатии халқи тоҷик, санъати меъмориву шаҳрсозӣ ва рушду тараққиёти Тоҷикистон дар солҳои соҳибистиқлолӣ шинос гардонида шуданд.
Ҳамзамон, дар доираи сафари мазкур намояндагони Иттифоқи ҷавонони Тоҷикистон якҷо бо ҳайати дигар кишварҳо ба Меҳмонхонаи иҷтимоии “Добрый Дом”-и (Хонаи Нек) шаҳри Москва, ки дар онҷо кӯдакони бемории саратондошта табобат ва зиндагӣ мекунанд, ташриф оварда, бо туҳфаҳо ва бозиҳои кӯдакона онҳоро шод намуданд.
7 декабр ҳайати иштирокдорон ба Маркази ҷавонони шаҳри Москва ташриф оварда, оид ба масоили тақвияти дӯстиву ҳамкориҳо муколамаҳои созанда доир карданд. Бахусус, оид ба таъсиси Ассотсиатсияи байналмилалии волонтёрон иштирокчиён ба гурӯҳҳо ҷудо шуда, таклифу пешниҳодҳои худро манзур ва муҳокима намуданд. Инчунин, дар ин чорабинӣ ба ҳамаи иштирокчиёни Форум аз кишварҳои Иттиҳоди давлатҳои мустақил Сертификат ва туҳфаи хотиравӣ тақдим карда шуд.
Дар маросими анҷомёбии Форум як қатор чеҳраҳо аз кишварҳои гуногун, аз ҷумла, намояндаи Ҷумҳурии Тоҷикистон Сангаков Ҳофиз барои саҳмгузорӣ дар фаъолияти волонтёрӣ бо ҷоизаи “Волонтёри ИДМ” сарфароз гардонида шуданд.
Дар чаҳорчӯбаи Форуми мазкур як зумра чорабиниҳо, аз қабили ҷаласаҳо, суҳбату вохӯриҳои ҳайатҳо, гурӯҳҳо, муколамаҳои дӯстӣ ва ҳамкорӣ дар форматҳои гуногун, мизҳои мудаввар, мастер-классҳо барои омода кардани ҳар гуна маводҳо, аксияҳо ва дигар чорабиниҳои фарҳангию фароғатӣ баргузор гардиданд, ки дар онҳо намояндагони Тоҷикистон фаъолона ширкат доштанд.
Маркази таҳлил ва иттилооти Кумита
