Имрӯз, 2 – юми майи соли 2025 дар доираи нақша – чорабиниҳои Кумитаи кор бо ҷавонон ва варзиши назди Ҳукумати Ҷумҳурии Тоҷикистон бо мақсади тарбияи ҳуқуқии ҷавонон ва ошно сохтани онҳо бо фазои сиёсии мақоми олии қонунбарори кишвар таҳти роҳбарии Раиси Кумита ҳайати 220 нафар фаъолҷавонон, кормандони сохтори марказӣ ва зерсохтори Кумита дар шаҳри Душанбе, аъзоёни Ташкилоти ҷамъиятии “Пайравони Пешвои миллат” ва волонтёрони Клуби волонтёрии Дастгоҳи марказии Кумита аз бинои боҳашамати Парлумони мамлакат боздид намуданд.
Ҳайати ҷавононро дар даромадгоҳи бинои наву пуршукӯҳи Парлумони кишвар вакилони Маҷлиси намояндагони Маҷлиси Олии Ҷумҳурии Тоҷикистон ва дигар масъулини Дастгоҳи Маҷлиси намояндагон истиқбол намуда, бо шароит ва фазои сиёсии ин шоҳкории аср бинои тозабунёдӣ Парлумони мамлакат онҳоро аз наздик ошно сохта, вобаста ба ваъолияти мақоми олии қонунгузор ва нақши он дар ташаккули институти қонунбарории кишвар ба ҷавонон маълумот ироа намуданд.
Боиси сарфарозӣ ва ифтихори ҳар як ҷавони ба бинои Парлумон ворид шуда он буд, ки дар саҳни ошёнаи якуми бино ҳайати ҷавононро шахсан Раиси Маҷлиси намояндагони Маҷлиси Олии Ҷумҳурии Тоҷикистон муҳтарам Файзалӣ Идизода истиқбол намуда, бо онҳо суҳбати гарму самимӣ намуданд.
Зимни суҳбат Файзалӣ Идизода ҳайати ҷавононро ба ифтихори оғози моҳвораи ҷавонон шодбош гуфта, дарҷ намудан, ки имрӯз Парламенти мамлакат ҷиҳати тақвияти ҳар чи бештари сохти давлатдорӣ, таҳким бахшидани волоияти қонун, ҳамоҳангсозии робитаҳо дар фазои ягонаи ҳуқуқии байналмилалӣ дар доираи бисёр созмонҳо ва иттиҳодҳои байнипарламентӣ нақши арзишмандро бар ҷой меоварад. Ҳадаф ва мароми ин мақоми олӣ дар шароити кунунӣ ҳифзи ҳуқуқу озодиҳои инсон ва шаҳрванд, Истиқлолияти давлатӣ, манфиатҳои миллӣ, Ваҳдати миллии тоҷикон, заминаи мусоиди ҳуқуқӣ фароҳам овардан барои рушду нумӯи тамоми бахшҳои ҷомеаи кишвар тавассути таҳия, қабули қонунҳо ва тасдиқи дигар санадҳои меъёрии ҳуқуқӣ мебошад.
– “Парлумони касбӣ дар тарбияи фарҳанги ҳуқуқии ҷавонони кишвар саҳми муносиб дорад. Аз ин лиҳоз хушояндаст, ки Кумита минбаъд низ мисли шумо ҳайати ҷавононро аз ВМКБ, вилоятҳои Суғду Хатлон ва шаҳру ноҳияҳои тобеъи ҷумҳурӣ барои ғани гардонидани ҷаҳонбинии сиёсӣ ва дучанд шудани орзӯҳои ватандӯстонаи ҷавонони тамоми қаламрави кишвар ҷиҳати боздид аз Парлумони кишвар ба шаҳри Душанбе оварад, то ҷавонон бо фазои сиёсии ҳокимияти қонунбарори мамлакат аз наздик ошно шуда, роҳи расидан ба чунин зинаҳои ватандориро тавассути дониши комил хониши пайваста пеша намоянд. Бо ҳамин мақсад ҷавонони азиз таъкид менамоям, ки хонед, хонед, хонед ва беҳтарин мутахассиси ҷавон дар соҳаи худ шавед. Зеро кадри донишманд ва соҳибшууру соҳибҳунар ҳамеша дар ҷомеаи мутамаддини мо мавқеъ ва ҷойгоҳи хешро пайдо мекунад.” – чунин тазаккур доданд дар суҳбат бо ҷавонон Файзалӣ Идизода – Раиси Маҷлиси намояндагони Маҷлиси Олии Ҷумҳурии Тоҷикистон.
Сипас, ҳамчун рамзи эҳтиром аз номи ҳайати аъзоёни Ташкилоти ҷамъиятии “Пайравони Пешвои миллат” ба Раиси Маҷлиси намояндагони Маҷлиси Олии Ҷумҳурии Тоҷикистон тӯҳфаи рамзии ташкилот супорида шуд.
Зимнан, баъд суҳбату дидор ва акси хотиравӣ бо Раиси Маҷлиси намояндагони Маҷлиси Олии Ҷумҳурии Тоҷикистон бо роҳнамоии вакилони мардумӣ ҳайати ҷавонон аз толорҳои бошукӯҳи Парлумони кишвар дидан намуданд.
Ёдовар мешавем, ки масоҳати умумии бинои наву пуршукӯҳи Парлумони кишвар 42 ҳазору 874 метри мураббаъ буда, дар ошёнаҳои бинои нави парлумон маҷлисҳои якҷоя барои 1 ҳазору 500 ҷойи нишаст, маҷлисгоҳҳои палатаи болоӣ ва поёнӣ ҳар кадоме бо 250 ҷойи нишаст, толори қабули меҳмонони олиқадр, маркази технология ва коммуникатсияҳои иттилоотӣ, маркази тиббӣ, китобхона, толор барои конфронсҳои матбуотӣ бо 350 ҷойи нишаст ва дигар ҳуҷраҳои корӣ ва ёрирасон ҷойгир карда шудааст.
Шараф Кароматзода
МАРКАЗИ ТАҲЛИЛ ВА ИТТИЛООТИ КУМИТА
