Имрӯз, 10 – уми январи соли 2025 дар толори марказии Кумита таҳти унвони “Иштироки фаъолонаи ҷавонон дар интихобот – нишонаи масъулияти баланди шаҳрвандии онҳост” мулоқоти Раиси Комиссияи марказии интихобот ва раъйпурсии Ҷумҳурии Тоҷикистон Бахтиёр Худоёрзода бо ҳайати кормандони сохтор ва зерсохтори Кумита аз 68 шаҳру ноҳияҳои ҷумҳурӣ доир шуд.
Нахуст, Раиси Кумитаи кор бо ҷавонон ва варзиши назди Ҳукумати чумҳурии Тоҷикистон Зулфиқор Гулаҳмадзода иброз дошт, ки мо дар арафаи интихоботи даъвати нави Маҷлиси Олӣ ва Маҷлисҳои маҳаллии вакилони халқ қарор дорем. Иштироки ҷавонон дар ин маъракаи муҳимми сиёсӣ нишонаи масъулияти баланди шаҳрвандии онҳост.
Зикр гардид, ки интихобот яке аз маъракаҳои муҳими сиёсӣ дар идоракунии давлат маҳсуб шуда, ҳамагон дар баргузории он бояд саҳмгузор бошанд.
Раиси Комиссияи марказии интихобот ва раъйпурсии Ҷумҳурии Тоҷикистон оид ба масъалаҳои мубрами раванди интихобот, моҳият ва аҳаммияти ин маъракаи муҳимми сиёсӣ, ҳуқуқи интихоботӣ, хусусияти низоми интихоботӣ дар Тоҷикистон ва дигар масъалаҳои вобаста ба мавзуъ бо ҷавонон суҳбат намуд. Инчунин вобаста ба нақшаҳои чорабиниҳои муштарак бо Кумитаи кор бо ҷавонон ва варзиши назди Ҳукумати чумҳурии Тоҷикистон изҳори назар карда, ҷиҳати тадбирҳои сомонёфта ба роҳбарияти Кумита ва ҷавонони фаъол изҳори миннатдорӣ намуд. Раиси Комиссияи марказӣ даъват кард, ки ҷавонон фаъолона дар ин маъракаи муҳимми сиёсӣ иштирок намуда, номзад ва ҳизби арзандаро интихоб намоянд.
Ҳамчунин узви Комиссияи марказии интихобот ва раъйпурсии Ҷумҳурии Тоҷикистон Махфират Хидирзода дар музокира иштирок намуда, вобаста ба тартиби баргузории «Рӯзи интихобкунандаи ҷавон», ки нимаи дуюми моҳи феврали соли 2025 ба нақша гирифта шудааст, ба ҳозирин иттилоъ дода, таъкид намуд, ки ҷиҳати дар сатҳи баланди ташкилию сиёсӣ баргузор шудани чорабинии мазкур нақшаи муштараки тасдиқшудаи Комиссияи марказии интихобот ва раъйпурсӣ ва Кумитаи кор бо ҷавонон ва варзиш бояд сари вақт дар амал татбиқ карда шавад.
Маркази таҳлил ва иттилооти Кумита
