Имрӯз, 5 – уми декабри соли 2024 дар доираи нақша – чорабиниҳои Кумитаи кор бо ҷавонон ва варзиши назди Ҳукумати Ҷумҳурии Тоҷикистон бахшида ба Рӯзи байналмилалии волонтёрон таҳти унвони «Хайрхоҳӣ шараф аст – волонтёр мешавем!» чорабинии идона доир гардид.
Дар чорабинии ҷашнии фарҳангӣ Зулфиқор Гулаҳмадзода – Раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Фарҳод Раҳимӣ – Раиси Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон ва Махфират Хидирзода – узви Комиссияи марказии интихобот ва раъйпурсии Ҷумҳурии Тоҷикистон иштирок ва суханронӣ намуданд.
Чорабинии идона бо иштироки масъулини соҳа, ҳайати волонтёрони Дастгоҳи марказии Кумита, аҳли ҳунар ва намояндагони ВАО доир гардид, ки зимни он 40 нафар ихтиёриёни фаъол бо сипоснома ва тӯҳфаҳои хотиравӣ қадрдонӣ гардиданд.
Таъкид шуд, ки таҷлили Рӯзи байналмилалии волонтёрон дар Тоҷикистони соҳибистиқлол далели таваҷҷуҳи Ҳукумати мамлакат, бахусус Президенти Ҷумҳурии Тоҷикистон муҳтарам Эмомалӣ Раҳмон нисбат ба ихтиёриён ва фаъолияти содиқонаву фидокоронаи онҳо мебошад.
«Воқеан волонтёрӣ — мактаби бузурги далерию шуҷоат, тавоноӣ, ҳушёрию доноӣ ва руҳияи солим буда, барои ташаккули ҳамаҷонибаи наврасону ҷавонон ва инсонҳо мусоидати фаъол менамояд. Зеро ҳамон шахсе волонтёр шуда метавонад, ки дили гарму нияти нек, ташаббусҳои наву идеяҳои ҷолиб дошта, некхоҳу некбин бошад»,- иброз намуд Раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Зулфиқор Гулаҳмадзода зимни чорабинӣ.
Бояд таъкид намуд, ки хайрхоҳӣ, амали нек кардан ё ҳаракати волонтёрӣ дар замони муосир чизи нав нест. Зеро миллати тамаддунофари тоҷик аз қадим ҳамеша бо роҳи ҳашар ва дар якҷоягӣ барои ободии деҳу дастгирии шахсони ниёзманду барҷомонда дасти ёрӣ дароз мекарданд. Аз ин хотир ҷавонону наврасонро мебояд дар пайравӣ ба гузаштагони соҳибтамаддун ин хайрхоҳиро, ки дар замони муосир бо шаклҳои нав зуҳур кардааст, пайгир бошанд ва давомдиҳандаи корҳои неки аҷдодон гарданд.
Ҳамзамон дар баробари барномаи идона ва базму тараби ҷавонӣ миёни ҳайати волонтиёрон викторина гузаронида шуд, ки ҳозирҷавобон бо тӯҳфа қадршиносӣ шуданд.
Ёдовар мешавем, ки соли 1985 бо пешниҳоди Ассамблеяи генералии Созмони Милали Муттаҳид 5 декабр Рӯзи волонтёрон (ихтиёриён) муқаррар гардид.
Маркази таҳлил ва иттилооти Кумита
