Имрӯз, 23 – юми октябри соли 2024 дар толори Кумита вобаста ба татбиқи қарори Ҳукумати Ҷумҳурии Тоҷикистон аз 28 апрели соли 2023, таҳти рақами №169 “Дар бораи тартиб оид ба меъёрҳои миллии тарбияи ҷисмонӣ ва солимии аҳолӣ” семинар – машварати омӯзишӣ доир гардид.
Чорабинии мазкур таҳти раёсати Зулфиқор Гулаҳмадзода – Раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Баҳрулло Давлатзода – муовини якуми раиси Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон ва бо иштироки фаъол ва фосилавии (онлайн) масъулини вазорату идораҳо, мақомоти иҷроияи ҳокимияти давлатии ВМКБ, вилоятҳои Суғду Хатлон, шаҳри Душанбе, шаҳру ноҳияҳои тобеи ҷумҳурӣ, муассисаҳои таҳсилоти олии касбӣ ва миёнаи умумӣ баргузор гардида, дар он 90 фисади иштирокчиён тариқи фосилавӣ (онлайн) иштирок ва бардошт намуданд.
Раиси Кумита зимни сухани ифтитоҳии семинар – машварати омӯзишӣ иброз доштанд, ки қарори мазкур бо мақсади оммавигардонии соҳаи тарбияи ҷисмонӣ ва варзиш, солимӣ ва омодагии аҳолӣ ба меҳнат ва ҳифзи Ватан қабул гардида, ҳамасола шаҳрвандони аз синни 9 то 70 сола ва аз ин боло меъёрҳои миллии тарбияи ҷисмонӣ ва солимии аҳолиро дар асоси принсипҳои ҳатмӣ ва ихтиёрӣ иҷро менамоянд.
Илова шуд, ки принсипи ҳатмии иҷрои меъёрҳои миллӣ нисбати хонандагон ва донишҷӯёни муассисаҳои таҳсилоти миёнаи умумӣ ва олии касбӣ, кормандони мақомоти давлатӣ татбиқ гардида, дигар шаҳрвандони Ҷумҳурии Тоҷикистон дар асоси принсипи ихтиёрӣ меъёрҳои миллиро амалӣ месозанд.
Кумита ҳамчун мақомоти ваколатдори давлатӣ дар соҳаи тарбияи ҷисмонӣ ва варзиш мусоидакунандаи асосии иҷрои талаботи қарори мазкур маҳсуб ёфта, ҷиҳати амалӣ намудани ҳадафу мақсадҳои гузошташуда омодагии худро барои ҳамкорӣ бо вазорату идораҳо, муассисаҳои таҳсилоти олӣ ва миёнаи касбӣ, мақомоти иҷроияи маҳаллии ҳокимияти давлатӣ иброз медорад.
Инчунин дар идомаи семинар – машварат омӯзишӣ Саидраҳмон Раҳмонов – директори Муассисаи давлатии “Маркази ҷумҳуриявии методӣ”-и Кумита баромад намуда, оид ба меъёрҳои миллии тарбияи ҷисмонӣ ва солимии аҳолӣ маълумоти муфассал пешниҳод карданд.
Маркази таҳлил ва иттилооти Кумита
