Имрӯз, 28 октябри соли 2024 дар Академияи идоракунии давлатии назди Президенти Ҷумҳурии Тоҷикистон курси такмили ихтисос барои сардорони сохторҳои кор бо ҷавонон ва варзиши вилоятҳо ва шаҳру ноҳияҳо аз рӯйи барномаи «Сиёсати давлатии ҷавонон дар Ҷумҳурии Тоҷикистон» оғоз гардид.
Дар ифтитоҳи курси мазкур, Зулфиқор Гулаҳмадзода – Раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Ҳилолбӣ Қурбонзода – муовини директори Агентии хизмати давлатии назди Президенти Ҷумҳурии Тоҷикистон, Шоҳрух Ҳамидов – директори Донишкадаи такмили ихтисос ва бозомӯзии хизматчиёни давлатӣ ва Карамалишо Карамалишоев – муовини ректори Академияи идоракунии давлатии назди Президенти Ҷумҳурии Тоҷикистон иштирок ва суханронӣ намуданд.
Мувофиқи ҷадвали машғулиятҳо, дар раванди курси мазкур, шарҳи Қонуни Ҷумҳурии Тоҷикистон «Дар бораи тарбияи ватандӯстии шаҳрвандон», Кодекси одоби хизматчии давлатии Ҷумҳурии Тоҷикистон, мавзуҳои Мактаби давлатдории Эмомалӣ Раҳмон: масъалаҳои ташаккул ва рушд, унсурҳои асосии бунёди давлати муосир бо ҷаҳонбинии дунявӣ, забони коргузории мақомоти давлатӣ ва риояи қоидаҳои имлои забони тоҷикӣ, заминаҳои ҳуқуқии хизмати давлатӣ дар Ҷумҳурии Тоҷикистон ва дигар мавзуҳои қобили таваҷҷуҳ пешкаши шунавандагон гардонида мешаванд.
Ёдовар мешавем, ки дар интиҳои курси мазкур, бахшида ба 30 солагии Конститутсияи Ҷумҳурии Тоҷикистон ҳамоиш таҳти унвони «Нақши Президенти Ҷумҳурии Тоҷикистон муҳтарам Эмомалӣ Раҳмон дар таҳия ва қабули Конститутсияи Ҷумҳурии Тоҷикистон» дар назар дониста шудааст.
Маркази таҳлил ва иттилооти Кумита
