Дар доираи нақша – чорабиниҳои Иттифоқи ҷавонони Тоҷикистон ҷиҳати баргузории ҳамоишҳои ҷавонони вазорату идораҳои давлатӣ дар бинои Кумитаи телевизион ва радиои назди Ҳукумати Ҷумҳурии Тоҷикистон Ҳамоиши ҷавонони соҳаи радио ва телевизиони Тоҷикистон доир шуд.
Ҳамоиши мазкур таҳти раёсати Зулфиқор Гулаҳмадзода – Раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, ҳамзамон Раиси Иттифоқи ҷавонон Тоҷикистон, Рустамзода Дилафрӯз – муовини Раиси Кумитаи телевизион ва радиои назди Ҳукумати Ҷумҳурии Тоҷикистон ва дигар нафарони масъул баргузор гардида, дар он ҳайати роҳбарони сохтор ва зерсохтори Кумитаи телевизион ва радиои назди Ҳукумати Ҷумҳурии Тоҷикистон, рӯзноманигорони телевизиону радио ва кормандони техникиву эҷодии соҳа иштирок намуданд.
Нахуст чорабинӣ бо намоиши дастовардҳои соҳаи радио ва телевизиони Тоҷикистон ибтидо ёфта, ба меҳмонон гӯшаҳои дастоварду музаффарияти сохтор ва зерсохтори Кумитаи телевизион ва радиои назди Ҳукумати Ҷумҳурии Тоҷикистон муаррифӣ карда шуд.
Раиси Кумита зимни суханронӣ дарҷ намуданд, ки воситаҳои ахбори омма дар раванди ташаккули афкори ҷомеа, хусусан тафаккури ҷавонону наврасон нақши муҳим мебозанд ва аз ин лиҳоз зиндагӣ ва кору таҳсил кардан дар ҷомеаи иттилоотӣ аз ҳар яки мо масъулияти ҷиддиро талаб менамояд. Дар чунин айём мо бояд хубро аз бад, сафедро аз сиёҳ ҷудо карда тавонем, то ки ҳам ба худамон ва ҳам ба наздикону атрофиёнамон зиён не, балки манфиат расонем.
Илова гардид, ки дар шароити пуртазоди имрӯза ва замони омӯзишу бархӯрди тамаддунҳо низ нақши ВАО бештар аз пештара намудор мегардад. Васоити ахбори оммаи Тоҷикистон бо шумули журналистҳои варзида баҳри инъикоси воқеии вазъи сайёра ва дохили кишвар, пешомадҳои он, инчунин ба таври шоиста ба ҷомеаи ҷаҳон муаррифӣ намудани Ватани маҳбубамон ҳамарӯза хизматҳои пурарзиш карда истодаанд.
Дар охири ҳамоиш як қатор кормандони ҷавони соҳаи радио ва телевизиони Тоҷикистон бо сипосномаҳои Кумитаи кор бо ҷавонон ва варзиш қадрдонӣ гардиданд.
Ҳамчунин гурӯҳи ҳаваскорони дастаҳои ҳунарии Кумитаи телевизион ва радиои назди Ҳукумати Ҷумҳурии Тоҷикистон бо намоиши фарҳангӣ ба чорабинӣ ҳусни дигар зам намуданд.
Маркази таҳлил ва иттилооти Кумита
