Имрӯз, 30 – уми октябри соли 2024 дар шаҳри Душанбе бо иштироки ҳайати намояндагони соҳаи кор бо ҷавонони кишварҳои узви Иттиҳоди Давлатҳои Мустақил ҷаласаи Шӯрои кор бо ҷавонони кишварҳои узви ИДМ доир гардид.
Пеш аз оғози ҷаласа ҳайати иштирокчиён аз гӯшаи намоишгоҳи дастовардҳои эҷодӣ ва илмиву техникии ҷавонон тоҷик боздид намуданд
Зимни ҷаласа Зулфиқор Гулаҳмадзода – Раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон иштирок ва суханронӣ намуда, ҳайати намояндагони соҳаи кор бо ҷавонони кишварҳои узви ИДМ – ро ба Тоҷикистон хайрамақдам гуфта, дарҷ намуданд, ки Ҳукумати Ҷумҳурии Тоҷикистон ҷавононро нерӯи тавонову созанда ва пешбарандаи ҳамаи соҳаҳои ҳаёти мамлакат меҳисобад ва ҳалли мушкилоту масъалаҳои вобаста ба зиндагӣ ва таҳсилу фаъолияти онҳоро ҳамчун самти афзалиятноки сиёсати иҷтимоии худ эътироф намудааст. Ҳукумати Ҷумҳурии Тоҷикистон дар такя ба соҳаи ваколатдор Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар самти тарбияи кадрҳои ҷавон барои ҳамаи соҳаҳои иқтисоди миллӣ, баланд бардоштани ҳисси ватандӯстӣ, дастгирии ҳамаҷонибаи мутахассисони ҷавон ва беҳтар гардонидани вазъи иҷтимоиву иқтисодии онҳо пайваста кӯшиш дорад. Дар ин росто, ба роҳ мондани ҳамкориҳо ҷиҳати рушди зеҳнии ҷавонон, ҷалби онҳо ба илм ва азхудкунии техникаву технологияҳои муосир яке аз самтҳои муҳими сиёсати давлатӣ мо ба шумор меравад.
Дар ҷаласа масъалаҳои беҳтар намудани сиёсати кор бо ҷавонони кишварҳои узви ИДМ ва роҳандозии ҳамкориҳои мутақобилан судманд бо созмону ташкилотҳои ҷавонони Иттиҳоди Давлатҳои Мустақил мавриди баррасӣ қарор гирифт.
Ёдовар мешавем, ки ҷаласаи Шӯрои кор бо ҷавонони кишварҳои ИДМ аз санаи 29 то 31 октябри соли 2024 дар шаҳри Душанбе ба нақша гирифта шуда, дар он намояндагони созмонҳои ҷавонон аз кишварҳои Иттиҳоди Давлатҳои Мустақил ширкат варзида, масъалаҳои муҳими рушди сиёсати ҷавонон, табодули таҷриба ва таҳкими робитаҳои фарҳангиро мавриди баррасӣ қарор медиҳанд.
Иштирокчиёни ҷаласаи Шӯрои кор бо ҷавонони кишварҳои ИДМ доир ба лоиҳаҳои муштараки ҳамкорӣ дар оянда миёни ҳам табодули афкор намуда, омодагии худро барои идомаи ҳамкорӣ дар доираи соҳаи кор бо ҷавонон бо кишварҳои ИДМ изҳор намуданд.
Маркази таҳлил ва иттилооти Кумита
