Имрӯз, 30 – уми октябри соли 2024 дар доираи нақша – чорабиниҳои Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар ҳамкорӣ бо Агентии хизмати давлатии назди Президенти Ҷумҳурии Тоҷикистон ва Академияи идоракунии давлатии назди Президенти Ҷумҳурии Тоҷикистон таҳти унвони “Таҳкими қобилиятнокии ҷавонон дар хизмати давлатӣ” бахшида ба 30 – солагии қабули Конститутсияи Ҷумҳурии Тоҷикистон ҳамоиши ҷавонони соҳаи хизмати давлатӣ доир карда шуд.
Ҳамоиш таҳти раёсати Зулфиқор Гулаҳмадзода – Раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Ҷумъа Давлатов – Директори Агентии хизмати давлатии назди Президенти Ҷумҳурии Тоҷикистон ва Даврон Сафарзода – Ректори Академияи идоракунии давлатии назди Президенти Ҷумҳурии Тоҷикистон баргузор гардида, дар он роҳбарони сохторҳои минтақавии Кумита, омӯзгорони Академия ва кормандони соҳаи хизмати давлатӣ иштирок намуданд.
Зимни ҳамоиш Раиси Кумита дарҷ намуданд, ки агар ба таърихи ташаккули ниҳоди хизмати давлатӣ дар Тоҷикистони соҳибистиқлол ҳамчун ҷузъи таркибии идоракунии давлатӣ назар андозем, маҷмӯи ҳидоятҳоро мебинем, ки ҳамагӣ барои фароҳам овардани заминаҳои мусоиди ташкилӣ, ҳуқуқӣ, иқтисодӣ ва иҷтимоӣ ҷиҳати ҷалб ва саҳми иштироки ҷавонон дар хизмати давлатӣ нигаронида шудаанд.
Илова намуданд, ки имрӯз пайравии ҷавонон аз сиёсати хирадмандонаи Пешвои миллат, муҳтарам Эмомалӣ Раҳмон, нақш ва ҷойгоҳи ҷавононро дар рушди ҷанбаҳои гуногуни ҳаёти иҷтимоӣ, ба вижа идоракунии давлатӣ барои саҳеҳ ва равшантар намудани масъалаи мазкур, инъикоси рисолати воқеии ҷавонон дар идоракунии давлатӣ, устувор намудани шуури идоракунии ҷавонон, аз байн бурдани монеаҳои сунъии роҳи инкишофи ҷавонон ва ба як низоми комилан мустақил табдил додани ҷавонгароӣ дар хизмати давлатӣ ва идоракунии давлатӣ заминаҳои устуворро ба вуҷуд меорад. Барои ноил шудан ба ҳадафҳои рушди идеалии ҷомеа ва расидан ба ҷомеаи шаҳрвандӣ тавассути идоракунии давлатӣ аз ҷониби ҷавонон, рушди шуурнокии сиёсӣ, иқтисодӣ, иҷтимоӣ ва фарҳангии ҷавонон, нумӯи машраби фикрӣ ва ташаккули ҷаҳонбинии ҷавонон дар асоси нишондодҳои шинохти муосир ва ҷаҳонӣ мутобиқи матлаб аст.
Дар охири ҳамоиш як қатор ҷавонони фаъол бо ифтихорнома ва сипоснома қадрдонӣ гардиданд.
Маркази таҳлил ва иттилооти Кумита
