Имрӯз дар толори Муассисаи давлатии «Китобхонаи миллии Тоҷикистон» бо ташаббуси Кумитаи иҷроияи Ҳаракати ваҳдати миллӣ ва эҳёи Тоҷикистон ва Мақомоти иҷроияи ҳокимияти давлатии шаҳри Душанбе бахшида 30-солагии Рӯзи қабули Конститутсияи таҳти унвони “Душанбе пойтахти тоҷикон ва шаҳри сулҳ” ҳамоиши ҷумҳуриявӣ баргузор гардид.
Дар кори ҳамоиш Раиси Кумитаи иҷроияи Ҳаракати ваҳдати миллӣ ва эҳёи Тоҷикистон – Рудобаи Мукаррам, Раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон – Зулфиқор Гулаҳмадзода, Муовини Раиси шаҳри Душанбе – Дилбар Одилзода, муовини вазири маориф ва илми Ҷумҳурии Тоҷикистон – Лутфия Абдухолиқзода, Президенти Академияи миллии илмҳои Тоҷикистон – Қобилҷон Хушвахтзода, Раиси Иттифоқи нависандагони Тоҷикистон – Низом Қосим ва Директори Маркази таълимии судяҳои назди Суди Олии Ҷумҳурии Тоҷикистон – Солеҳ Завқизода иштирок ва суханронӣ намуданд.
Гуфта шуд, ки шаҳри Душанбе ҳамчун пойтахти Тоҷикистони соҳибистиқлол дорои захираҳои бойи сайёҳию инфрасохтори мукаммал буда, тули солҳои охир ба макони баргузории чорабиниҳои байналмилалии сиёсию иқтисодӣ ва илмию фарҳангӣ табдил ёфта, дар таҳкиму тақвият бахшидани нуфузи байналмилалии Тоҷикистон нақши бузург дорад.
Душанберо барҳақ шаҳри ҷавонӣ меноманд, зеро ин шаҳр маҳз бо дасти ҷавонони боору номуси халқи тоҷик бунёд гардидааст. Биноҳои баландошёнаи замони нав қомат рост карданд, ки симои шаҳрро боз ҳам зебову дилоротар гардониданд, илова гардид зимни чорабинӣ.
Инчунин, дар Ҳамоиш роҳбарону намояндагони вазорату идораҳои давлатӣ, ташкилоту муассисаҳо, аъзои Шурои куҳансолони Ҳаракати Ваҳдати миллӣ ва эҳёи Тоҷикистон ва намояндагони воситаҳои ахбори омма иштирок намуданд.
