8 октябри соли 2024 дар толори Донишгоҳи техникии Тоҷикистон ба номи М.Осимӣ Ҳамоиши кормандони ҷавони соҳаи адлия дар мавзӯи “Дастовардҳои соҳаи Вазорати адлия дар даврони Истиқлолият” дар сатҳи баланди ташкилӣ баргузор гардид.
Дар оғоз иштирокчиёни ҳамоиш аз намоишгоҳи молу маҳсулот ва дастовардҳои соҳаи Вазорати адлия, аз ҷумла, натиҷаҳои фаъолияти илмӣ ва дигар дастовардҳои соҳа дидан намуда, ба кори масъулин баҳои баланд доданд.
Дар чорабинии мазкур муовини якуми раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Раҳимзода Шабнам ва муовини якуми вазири Адлия Нигина Ализода бо суханони ифтитоҳӣ баромад намуда, аҳли нишастро ба ифтихори 33-солагии ҷашни Истиқлоли давлатӣ шодбош гуфтанд.
Зикр гардид, ки 9 сентябри соли 1991 Тоҷикистон аз мустақилияти худ ба оламиён дарак дод ва бо ҳамин дар харитаи сиёсии ҷаҳон давлати миллии тоҷикон дубора арзи ҳастӣ пайдо намуд. Имрӯз бошад, Тоҷикистон бо қадамҳои устувор ба сӯйи рушд пеш меравад ва дар фазои осоиштаи он на фақат тоҷикон, балки ҳамагон ҳаёти хушбахтона мебаранд, механданд, шодӣ мекунанд, орзуҳои ширини худро амалӣ месозанд, кор мекунанд, месозанд, комронӣ мекунанд ва оромона сар ба болин мегузоранд. Дар соҳаи адлияи мамлакат низ дастовардҳо дар замони соҳибистиқлолӣ назаррас буда, сол ба сол шароити соҳа беҳтар шудаистодааст. Тамоми имкониятҳои зарурӣ ҷиҳати боз ҳам тараққӣ додани соҳаи мазкур ва бартарафсозии камбудиҳои ҷойдошта фароҳам оварда шудааст, ки дар ин самт саҳми ҷавонони Вазорат хеле муҳим арзёбӣ мегардад.
Инчунин, доир ба масъалаҳои дастовардҳои ҷавонони соҳаи вазорати адлия, бахусус, талош ва дастовардҳои илмӣ ва амалии ҷавонони соҳаи адлия дар даврони Истиқлолият, дастовардҳои илми дастовардҳои таълимӣ ва намояндагони соҳа бо маърӯзаҳои пурмуҳтаво баромад намуданд. Дар охир ҷавонони фаъоли соҳа бо Сипоснома қадрдонӣ гардиданд.
