Ҳамоиш таҳти раёсати Зулфиқор Гулаҳмадзода – Раиси Кумитаи кор бо ҷавонон ва варзиши назди Ҳукумати Ҷумҳурии Тоҷкистон ва Ҳотамшо Латифзода – муовини якуми Раиси Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикистон доир шуда, дар он кормандони ҷавони мақомоти ҳолатҳои фавқулода ва мудофиаи граждании кишвар иштирок намуданд.
Пеш ағози қисми расмии чорабинӣ Раиси Кумита дар якҷоягӣ бо ҳайати шахсии Кумитаи ҳолатҳои фавқулодда ва мудофиаи гражданӣ аз муосиртарин дастовардҳои техникиву иноватсионии соҳаи ҳолатҳои фавқулодда ва мудофиаи граждании мамлакат боздид намуданд.
Дар ибтидои чорабинӣ Суруди миллӣ ба таври зинда зам – зама гардид.
Сипас, Раиси Кумита роҷеъ ба таърихи ба даст овардани Истиқлоли давлатӣ ва саҳми ҷавонон ҷиҳати расидан ба дастовардҳои назаррас дар ин давраи таърихӣ ибрози андеша намуда, ироа намуданд, ки давоми солҳои соҳибистиқлолии мамлакат бо талошу дастгириҳои Президенти Ҷумҳурии Тоҷикистон муҳтарам Эмомалӣ Раҳмон нақши ҷавонон дар сиёсат, рушди соҳаҳои низомӣ, иҷтимоӣ, иқтисодӣ ва фарҳангӣ баръало эҳсос мегардад.
Ҳамзамон ба фаъолияти Кумита дар замони соҳибистиқлолӣ баҳои баланд дода дарҷ намуданд, ки таҳлили фаъолияти рӯз ба рӯзи Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикистон нақши созандаи Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмонро дар рушду тавсеаи на танҳо Кумита, балки коҳиши хатари офатҳо баръало нишон медиҳад. Дида мешавад, ки ин Кумита зина ба зина маҳз бо дастгирии ҳамаҷонибаи Сарвари давлат рушд кардаву барномаҳои қобили таҳсини коҳиши хатари офатҳоро амалӣ кардааст. Ва на танҳо ин. Пешвои миллат ҳамеша барои такмили техникиву фароҳам овардани заминаҳои фаъолияти самараноки ниҳодҳои мудофиаи гражданӣ аз иқдомоти созандаву бунёдӣ кор гирифтаанд.
Ҷавонон имрӯз соҳиби саводи баланд, касбу кори гуногун буда, дар пешрафти илму техника, ихтироъкориву навоварӣ саҳми арзанда мегузоранд. Онҳо дар озмуну мусобиқаҳои сатҳи байналмилалӣ иштирок намуда, Парчами давлатиро баланд мебардоранд, ки шоистаи таҳсину офарин аст, — чунин афзӯд Раиси Кумита.
Ҳамзамон муовини якуми Раиси Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикистон вобаста ба аҳмияти Истиқлоли давлатӣ дар ҳаёту фаъолияти ҳаррӯзаи ҷавонон ва нақши ҷавонон дар пойдорӣ ва ҳифзи соҳибистиқлолии кишвари маҳбубамон табодули афкор намуданд.
Дар идомаи чорабинӣ маърӯзачиён доир ба дастовардҳои ҷавонон дар замони соҳибистиқлолии мамлакат, пешгирии шомилшавии онҳо ба ҳизбу ҳаракатҳои террористиву экстремистӣ ва дигар мавзӯъҳои мубрам баромад карда, аз ҳозирин даъват ба амал оварданд, ки бо шукргузорӣ аз фазои сулҳу субот ва якпорчагии Ватан баҳри пешрафту шукуфоӣ, ободӣ ва ояндаи дурахшони Тоҷикистон саҳми арзандаи хешро гузошта, мояи ифтихори наслҳои оянда бошанд.
Дар фарҷом барои меҳнати софдилона ва ноил гардидан ба натиҷаҳои назарраси корӣ як қатор кормандони ҷавони Кумитаи ҳолатҳои фавқулодда ва мудофиаи гражданӣ бо «Сипоснома»-и Кумитаи кор бо ҷавонон ва варзиши назди Ҳукумати Ҷумҳурии Тоҷикистон сарфароз гардонида шуданд.
Маркази таҳлил ва иттилооти Кумита
