Имрӯз, 28 – уми ноябри соли 2024 дар Китобхонаи миллии Тоҷикистон Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар ҳамкорӣ бо Дастгоҳи иҷроияи Президенти Ҷумҳурии Тоҷикистон ва шарикони рушд таҳти унвони «Таҳкими ҳамкории бисёрҷониба дар самти муқовимат бо ҷалби ҷавонон ба гурӯҳҳои мухталифи хатарзо» конференсияи байналмилалӣ баргузор намуд.
Конференсияи байналмилалӣ ба табодули методика ва таҷрибаи беҳтарини давлатҳои Созмони ҳамкории Шанхай ва Иттиҳоди Давлатҳои Мустақил, инчунин ба вуҷуд овардани шарикии нав барои таҳкими ҳамкории бисёрҷониба, таҳияи тавсияҳо оид ба тақвияти ҳамкории бисёрҷониба барои пешгирии ҷалби ҷавонон ба гурӯҳҳои хатарзо равона гардидааст.
Чорабинии мазкур дар се ҷаласаи панелӣ баргузор ва натиҷагирӣ карда шуда, дар ҳар як ҷаласаи он олимону мутахассисони дохилу хориҷ бо маърӯза ва рӯнамоӣ баромад намуда, атрофи масъалаҳои баррасишаванда мулоҳизаву музокираронӣ намуданд.
Ҳамзамон зимни ҷасалаи панелии сеюми Конференсияи байналмилалӣ, ки дар он мавзуи асосӣ “Таҳкими ҳамкориҳои бисёрҷониба дар самти муқовимат бо ҷалби ҷавонон ба гурӯҳҳои мухталифи хатарзо” мавриди баррасӣ ва муҳокима қарор гирифт, таҳти раёсати Зулфиқор Гулаҳмадзода – Раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Сайдулло Қувватзода – доктори илмҳои сиёсӣ, намояндаи Дастгоҳи иҷроияи Президенти Ҷумҳурии Тоҷикистон ва Зарина Ҷураева – роҳбари Лоиҳаҳои Барномаи рушди СММ дар Ҷумҳурии Тоҷикистон оид ба пешгирии ифротгароӣ доир шуда, дар он намояндагони вазорату идораҳои дахлдор, олимону мутахассисон ва коршиносони дохиливу хориҷӣ тариқи ҳузуриву маҷозӣ (онлайн) иштирок ва суханронӣ намуданд.
Раиси Кумита зимни суханронӣ дарҷ намуданд, ки пешрафти миллат бидуни саҳми ҷавонон имконнопазир буда, шукуфоӣ, зебоӣ ва созандагиву беҳбудии зиндагӣ аз ҷавонони далеру шуҷоъ, боғайративу ташаббускори ва матонати зиёдеро тақозо мекунад. Вале дар баробари ин аз ҳама қишри осебпазир, ки гурӯҳҳои иртиҷоӣ метавонанд ба роҳу усулҳои гуногун таъсири худро ба онҳо расонанд, ин низ ҷавонон ҳастанд.
Илова намуданд, ки таъмини амнияти давлат ва ҷомеа, арҷгузорӣ ба ҳуқуқу озодиҳои инсон ва шаҳрванд, махсусан эҳтиром гузоштан ва таъмини кафолати амалишавии ҳуқуқу озодиҳои наврасону ҷавонон ҳамеша дар меҳвари фаъолияти Ҳукумати Ҷумҳурии Тоҷикистон қарор дорад. Наврасону ҷавонони Тоҷикистон бо дарки баланди масъулият эҳсос менамояд, ки гаравидан ба гурӯҳҳои ифротӣ барои пешрафту шукуфоии кишвар монеаи ҷиддӣ эҷод менамояд. Тундгароӣ ва ифротгароӣ сарчашмаи терроризм буда, ҳифзи мафкура ва андешаи ҷавонон вазифаи ҷонии аҳли ҷомеа, хосса худи қишри фаъоли ҷомеа, яъне ҷавонон мебошад.
Ҳамзамон дар конференсия иброз гардид, ки тарбияи ҳарбӣ-ватандӯстӣ, тарғиби фарҳанги миллӣ ва пешгирии майли бегонапарастӣ, муборизаи идеологӣ бар зидди терроризм, экстремизм ва амсоли инҳо аз самтҳои аввалиндараҷаи тарбияи насли ҷавон ба шумор рафта, омӯзгорон ва падару модарон, собиқадорону фаъолон бояд насли ҷавонро дар руҳияи ватандӯстию хештаншиносӣ тарбия намоянд.
Зимни корференсия олимону мутахассисон ва коршиносони дохиливу хориҷӣ тариқи ҳузуриву маҷозӣ (онлайн) суханронӣ намуда, дарҷ намуданд, ки ҳоло вақти он расидааст то башарият дар якҷоягӣ дар пешгирии ин амали мудҳиш гомҳои нав гузошта, дар мубориза алайҳи ҷиноятҳои террористӣ аз истифодаи механизм ва роҳу усулҳои муосир кор гиранд. Дар ин маврид, шеваи ягонаи муносибат ба ин падидаи номатлуб ва гурӯҳҳои ба ин омилҳо мусоидаткунанда амри зарурӣ дониста мешавад. Инчунин, дар ин маврид гуфтугуи фарҳангҳои мухталиф ва шинохту эҳтироми ҳамдигари низ калиди муваффақиятҳо хоҳад буд.
Изҳор гардид, ки мубориза бар зидди ҷинояткорӣ ва пешгирии ҳамроҳшавии ноболиғон ва ҷавонон ба гурӯҳҳои ифротӣ вазифаи дастҷамъонаи тамоми шаҳрвандони мамлакат ба шумор меравад. Бетарафӣ нисбат ба ин зуҳуроти номатлуб хиёнат ба оила ва Ватан – Модар мебошад. Чунки ин омилҳои номатлуб ба рушди минбаъдаи давлат халали ҷиддӣ ворид намуда, ба ваҳдати миллӣ, истиқлолияти давлатӣ ва бехатарии мамлакат таҳдид менамоянд.
Маҳз бо ин мақсад дар мамлакат Қонуни Ҷумҳурии Тоҷикистон «Дар бораи тарбияи ватандӯстии шаҳрвандон» қабул гардид, ки он дар шароити муташанниҷи авзои ҷаҳонӣ, масъалаҳои ҷаҳонишавӣ ва геосиёсӣ, мавҷудияти хатарҳо ва таҳдидҳои замони муосир, эмин нигоҳ доштани шаҳрвандон, ҳифзи Ватан, ҳимояи манфиатҳои давлатӣ, таҳкими истиқлол, амният ва иқтидори мудофиавии он иқдоми муҳим ва саривақтӣ мебошад.
Инчунин иштирокдорони конференсия дар ҷаласаҳои панелӣ дар мавзуъҳои «Нақши сохторҳои кор бо ҷавонон дар пешгирии ҳамроҳшавии ҷавонон ба гурӯҳҳои хатарзо», «Нақши иттилоот дар таъмини амнияти миллӣ» ва «Нақши воситаҳои ахбори омма дар пешгирии тамоюли ҷавонон ба равияҳои радикалӣ» ибрози назар намуданд.
Маркази таҳлил ва иттилооти Кумита
