Имрӯз, 15 – уми феврали соли 2025 Мақомоти иҷроияи ҳокимияти давлатии шаҳри Душанбе дар ҳамкорӣ бо Кумитаи кор бо ҷавонон ва варзиши назди Ҳукумати Ҷумҳурии Тоҷикистон вобаста ба иҷрои қарори Раиси шаҳри Душанбе аз 06 феврали соли 2025, №64 дар бораи баргузор намудани мусобиқаи кушоди варзишӣ оид ба волейболи касбӣ ва ғайрикасбӣ байни бонувони вазорату идораҳо ва ташкилоту муассисаҳо барои дарёфти «Ҷоми Раиси шаҳри Душанбе» бахшида ба «Рӯзи Модар» дар Маҷмааи варзишии Донишгоҳи миллии Точикистон маросими кушодашавии чорабиниро доир намуд.
Дар мусобиқаи кушоди варзишӣ оид ба волейболи касбӣ ва ғайрикасбӣ байни бонувони вазорату идораҳо ва ташкилоту муассисаҳо барои дарёфти «Ҷоми Раиси шаҳри Душанбе», ки аз санаи 15 – уми феврал то санаи 6 – уми марти соли 2025 идома меёбад, зиёда аз 40 даста миёни ҳам барои дарёфти «Ҷоми Раиси шаҳри Душанбе» рақобат мекунанд.
Зимни маросими кушодашавии мусобиқаи мазкур Зулфиқор Гулаҳмадзода – Раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон ва Дилбар Одилзода – муовини Раиси шаҳри Душанбе бо сухани ифтитоҳи баромад намуданд.
Ироа карда шуд, ки саҳми модарони тоҷик дар тарбия ва ба камол расонидани фарзандон дар руҳияи ватандӯстиву худшиносӣ ва таъмини иштироки онҳо дар мусобиқаҳои сатҳи байналмилалӣ боиси таҳсин аст.
Иброз гардид, ки имрӯз давлату Ҳукумати мамлакат ба ҳар як варзишгарзан таваҷҷуҳ ва эҳтироми хосса доранд. Бинобар ин, ҷавобан ба ин таваҷҷуҳу ғамхориҳо пайваста баҳри гулгулшукуфоии минбаъдаи Тоҷикистони соҳибистиқлол дар қатори мардон ва чун шарики боэътимод дар кулли чорабиниҳои ҷамъиятиву сиёсӣ бо саҳмгузорӣ ва иштироки фаъолона, хираду заковат, матонату диловарӣ намунаи ибрат бошанд.
Ёдовар мешавем, ки ҳамасола дар саросари мамлакат бахшида ба Рӯзи Модар ҳамоишу конфронс, мизҳои мудаввар ва барномаҳои фарҳангию фароғатӣ, мусобиқаҳои варзишӣ доир гардида, инчунин барои занону духтарон маҳфилҳои идона ташкил мешаванд.
Дар сатҳи давлатӣ ҷашн гирифтани Рӯзи Модар нишонаи эътибору эҳтироми зиёди давлату Ҳукумати мамлакат нисбат ба модарону занон мебошад.
Маркази таҳлил ва иттилооти Кумита
