Имрӯз, 10 – уми феврали соли 2025 мутобиқи амри Президенти Ҷумҳурии Тоҷикистон аз 4 – уми марти соли 2005, №АП – 1677 ҷиҳати ташкил ва баргузории нишастҳои матбуотӣ дар вазорату идораҳо дар бинои Кумитаи кор бо ҷавонон ва варзиши назди Ҳукумати Ҷумҳурии Тоҷикистон бо иштироки 40 нафар намояндагони васоити ахбори оммаи давлативу ғайридавлатӣ оид ба фаъолити Кумита дар соли 2024 нишасти матбуотӣ доир гардид.
Нишасти мазкур таҳти раёсати Зулфиқор Гулаҳмадзода – Раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон ва Шуҳрат Азиззода – намояндаи Дастгоҳи иҷроияи Президенти Ҷумҳурии Тоҷикистон баргузор гардида, зимни он дар баробари намояндагони ВАО инчунин муовинони Раис, ректори Донишкадаи тарбияи ҷисмонии Тоҷикистон ба номи С. Раҳимов ва ҳайати кормандони сохтор ва зерсохтори Кумита иштирок намуданд.
Нахуст, Раиси Кумита нақши намояндагони васоити ахбори оммаро дар инъикоси саривақтии дастоварду музаффарияти соҳаи кор бо ҷавонон ва варзиши кишвар бориз арзёбӣ намуда, иштироки онҳоро дар нишасти матбуотӣ хайрамақдам гуфтанд.
Сипас, вобаста ба фаъолияти Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар давоми соли 2024 ба доираи васеи намояндагони ВАО маълумот пешниҳод намуда, баён доштанд, ки дар соли 2024 аз ҷониби Кумита, сохторҳои маҳаллӣ ва ташкилотҳои система, инчунин Иттифоқи ҷавонони Тоҷикистон дар самти татбиқи сиёсати давлатии ҷавонон 42534 чорабинӣ бо фарогирии 4 263 590 нафар ҷавонон ва аҳли ҷомеа баргузор гардид, ки ин нишондиҳанда нисбат ба соли 2023 аз лиҳози теъдоди чорабиниҳо 430 адад ва аз лиҳози фарогирӣ 301 126 нафар зиёд мебошад.
Зимнан, иттилоъ дода шуд, ки дар соли 2024 11 026 иншооти варзишӣ новобаста аз шакли моликияташон ба қайд гирифта шудааст, ки аз ин 127 варзишгоҳ, 7 662 майдончаи варзишӣ, 2273 толорҳои варзишӣ, 104 ҳавзҳои шиноварӣ, 89 маҷмааҳою марказҳои солимгардонӣ, бошгоҳои варзишӣ ва 771 иншооти махсуси варзишӣ мавҷуд мебошанд, ки фаъолияти пурсамар доранд.
Ҳамзамон дарҷ шуд, ки дар соли 2024 аз ҷониби Кумита ва ташкилотҳои ҷамъиятии федератсияҳои варзишии кишвар 1 126 нафар варзишгар, аз ҷумла 354 бонуи узви дастаҳои мунтахаби Ҷумҳурии Тоҷикистон аз намуди варзиши олимпӣ ва ғайриолимпӣ ба 82 мусобиқаҳои сатҳи байналмилалии варзишӣ сафарбар гардида, дар натиҷа ба хазинаи варзишии кишвар 448 медал, аз ҷумла 134 тилло, 108 нуқра ва 206 биринҷӣ ворид намуданд, ки натиҷаҳои бадастовардаи варзишгарон нисбат ба соли 2023, 87 медал (13 тилло, 22 нуқра ва 52 биринҷӣ) зиёд мебошад. Инчунин дар соли 2024 448 маротиба Парчами давлатии Ҷумҳурии Тоҷикистон дар мусобиқаҳои сатҳи байналмилалӣ бо шарофати дастоварди варзишгаронамон баланд бардошта шуда, 134 маротиба суруди миллӣ ба хотири дастоварди онҳо дар мусобиқаҳои сатҳи байналмилалӣ садо додааст.
Баъд аз пешниҳоди маълумот оид ба фаъолияти Кумита дар соли 2024 намояндагони ВАО саволҳои худро манзур намуданд, ки ба ҳамаи саволҳои ироа шуда аз ҷониби роҳбарияти Кумита ҷавобҳои мушаххас баён гардид.
Маркази таҳлил ва иттилооти Кумита
