Таҳти чунин унвон имрӯз 15 – уми феврали соли 2025 дар бинои Кохи афсарони Вазорати мудофиаи кишвар Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар ҳамкорӣ бо Вазорати мудофиаи Ҷумҳурии Тоҷикистон бахшида ба 32 солагии Рӯзи Артиши миллии Ҷумҳурии Тоҷикистон Ҳамоиши ҷавонон ва хизматчиёни ҳарбиро доир намуд.
Чорабинӣ таҳти раёсати Зулфиқор Гулаҳмадзода – Раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон ва Музаффар Раҳимзода – муовини вазири мудофиаи Ҷумҳурии Тоҷикистон доир шуда, дар он афсарону сарбозони Вазорати мудофиаи Ҷумҳурии Тоҷикистон, Оркестри ҳарбии Гвардияи миллии Ҷумҳурии Тоҷикистон ва кормандони масъули самти тарбияи ватандӯстии Кумита иштирок намуданд.
Нахуст, Раиси Кумита ва муовини вазири мудофиа афсарону сарбозонро ба ифтихори 32 солагии Рӯзи Артиши миллии Ҷумҳурии Тоҷикистон самимона шодбош гуфта, дарҷ намуданд, ки боиси ифтихору сарфарозист, ки дар даврони Истиқлолияти давлатӣ обрӯю эътибори Артиши миллӣ дар миёни аҳолӣ, ба хусус ҷавонон афзун гашта, мардуми кишвар хизматҳои шабонарӯзии афсарону аскарони Қувваҳои Мусаллаҳи меҳанро қадр мекунанд ва аз муҳофизони Ватани хеш ифтихор менамоянд, ки ин албатта амали воқеист. Чунки низомиёни мамлакат ҳанӯз аз рӯзҳои таъсисёбии Артиши миллӣ дар таҳким бахшидани сохти кониститутсионӣ дар мамлакат, ҳимояи ҳама дастоварду музаффариятҳои истиқлолият, пойдории сулҳу субот, таъмини ҳаёти осоиштаи мардумони Тоҷикистони азиз ва баланд бардоштани иқтидори мудофиавии кишвар саҳми арзанда гузоштаанд.
Дар партави сиёсати хирадмандонаи бунёдгузори Артиши миллӣ, Сарфармондеҳи Олии Қувваҳои Мусаллаҳ, генерали артиш муҳтарам Эмомалӣ Раҳмон, нерӯҳои мусаллаҳи давлати навбунёду соҳибистиқлоламон имрӯз ба ҳимоятгари марзу буми аҷдодӣ ва шоҳсутуни Тоҷикистони азиз табдил ёфтааст.
Ироа шуд, ки қарзи шаҳрвандии ҳар як ҷавонписари бонангу номус аст ба ҷо овардани уҳдадории ҳарбӣ, яъне хизмат ба Ватан-Модар!
Таъкид гардид, ки ҷавонон бояд бо азми дил баҳри пойдории сулҳу оромӣ, Истиқлолу озодӣ дар сафи Артиши миллӣ хизмат намоянд, зеро Қувваҳои Мусаллаҳи Ҷумҳурии Тоҷикистон дастоварди муҳими замони соҳибистиқлолии мамлакат буда, омили асосии нигаҳдории давлатдории миллӣ маҳсуб меёбад.
Сипас, ба хотири хизмати содиқонаву далерона ва ҳифз намудани арзишҳои милливу давлатӣ ба ифтихори 32 солагии Рӯзи Артиши миллии Ҷумҳурии Тоҷикистон чанде аз афсарону сарбозон бо медали “Шуҷоат ва ҷавонмардӣ” ва Сипосномаву тӯҳфаҳои хотиравии Кумитаи кор бо ҷавонон ва варзиш қадршиносӣ гардиданд.
Ҳаминтавр дар қисми фарҳангии чорабинӣ аз ҷониби навозандагони Оркестри ҳарбии Гвардияи миллии Ҷумҳурии Тоҷикистон суруду оҳангҳои ватандориву ватандӯстӣ пешкаши ҳозирин гардонида шуд.
Маркази таҳлили ва иттилооти Кумита
