Имрӯз, 21 – уми апрели соли 2025 дар шаҳри Леваканти вилояти Хатлон дар толори Муассисаи давлатии Донишкадаи байналмилалии Леваканти Донишгоҳи байналмилалии сайёҳӣ ва соҳибкории Тоҷикистон таҳти роҳбарии Зулфиқор Гулаҳмадзода – Раиси Кумита ва бо иштироки муовини якум ва муовинони Раис, котиби генералии Кумитаи миллии олимпии Тоҷикистон, ректори Донишкадаи тарбияи ҷисмонии Тоҷикистон ба номи С. Раҳимов, роҳбарони воҳидҳои сохторӣ, роҳбарони муассисаҳои зертобеъ, роҳбарони сохтор ва зерсохтори Кумита дар ВМКБ, вилоятҳои Суғду Хатлон, шаҳри Душанбе, шаҳру ноҳияҳои тобеи ҷумҳурӣ ва кормандони Дастгоҳи марказии Кумита ҷаласаи сайёри Ҳайати мушовараи Кумитаи кор бо ҷавонон ва варзиши назди Ҳукумати Ҷумҳурии Тоҷикистон оид ба ҷамъбасти натиҷаҳои рушди соҳаи кор бо ҷавонон ва варзиши Ҷумҳурии Тоҷикистон ва фаъолияти Кумита дар семоҳаи якуми нимсолаи аввали соли 2025 ва вазифагузориҳо то ҷамъбасти нимсолаи якуми соли 2025 баргузор гардид.
Маврид ба ёдоварист, ки пеш аз оғози ҷаласаи сайёри Ҳайати мушовара роҳбарияти Кумита аз дастовард ва шароиту имконоти таҳсили ҷавонони дар Муассисаи давлатии Донишкадаи байналмилалии Леваканти Донишгоҳи байналмилалии сайёҳӣ ва соҳибкории Тоҷикистон ба таҳсил фарогирифташуда дидан намуда, зимни суҳбат бо донишҷӯёни муассиса барои самаранок истифода бурдани чунин имконоти муосири тадрис дар чунин як бинои муҷҷаҳазу зебои навбунёд таъкид намуда, иброз доштанд, ки ҳар лаҳзаи умрро ғанимат шуморед ва дар чунин шароити хуб ҳар яки шумо бояд пеши худ ҳадаф гузоред, ки беҳтарин мутахассиси сатҳи байналмилалӣ мешавед.
Зимнан роҳбарияти Кумита ва ҳайати ҳамроҳи он дар Литсейи касбӣ-саноатии кимиёвии шаҳри Левакант, ки дар шафати Муассисаи давлатии Донишкадаи байналмилалии Леваканти Донишгоҳи байналмилалии сайёҳӣ ва соҳибкории Тоҷикистон қарор дорад аз осорхонаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон боздид намуданд.
Ҷаласаи сайёри Ҳайати мушовара бо суханони ифтитоҳии Раиси Кумита оғоз гардида, вобаста ба ҷамъбасти натиҷаҳои рушди соҳаи кор бо ҷавонон ва варзиши Ҷумҳурии Тоҷикистон ва фаъолияти сохтор ва зерсохторҳои Кумита дар семоҳаи якуми нимсолаи аввали соли 2025 аз ҷониби муовини якуми Раиси Кумита ҳисоботи муфассал ироа гардид.
Ҳамзамон сардорони Раёсатҳои кор бо ҷавонон ва варзиши вилоятҳои Суғду Хатлон, шаҳри Душанбе ва ВМКБ аз натиҷаи фаъолияти соҳа давоми семоҳаи сипаригардида дар ҳудуди минтақаи худ ҳисобот пешниҳод намуда, барои ислоҳи мушкилиҳои ҷойдошта аз ҷониби роҳбарият дастуру супоришҳои мушаххас гирифтанд.
Сипас, муовинони соҳавӣ фаъолияти соҳаи кор бо ҷавонон ва варзишро дар тамоми шаҳру ноҳияҳои ҷумҳурӣ мутобиқи ҷадвали махсус мавриди таҳлил қарор дода, натиҷаи таҳлилро тавассути ҳисоботи таҳлилӣ ироа намуданд.
Аз натиҷаи ҳисоботи ироа шуда фаъолити сохтор ва зерсохтори Кумита давоми семоҳаи якуми нимсолаи аввали соли 2025 натиҷагирӣ карда шуда, Раиси Кумита, ҷиҳати иҷрои пурра ва самараноки дастуру супоришҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, Ҳукумати ҷумҳурӣ ва Дастгоҳи иҷроияи Президенти Ҷумҳурии Тоҷикистон ва вазифаҳои низомномавии Кумита, инчунин бартараф намудани камбудиву норасоиҳо ва бозҳам беҳтар намудани фаъолият то ҷамъбасти нимсолаи аввали соли 2025 ба масъулин дастуру супоришҳо доданд.
Зимнан ҳамаи масъулини сохтор ва зерсохтори Кумита вобаста ба истиқбол ва таҷлили бошукӯҳи Рӯзи ҷавонони Тоҷикистон ва Рӯзи ҷаҳонии футбол дар тамоми қаламрави кишвар вазифадор карда шуда, ҳамзамон талаб карда шуд, ки дар раванди ҳассоси ҷаҳонгароӣ зиракии сиёсиро аз даст надода, ҷиҳати ба роҳи рости ватандориву ватандӯстӣ ҳидоят намудани ҷавонон ва баланд бардоштани нуфӯзи варзиши тоҷик аз тамоми фишангҳои солиму созанда истифода намоянд.
Ҳамчунин таъкид гардид, ки дар ҳамкорӣ бо мақомоти дахлдор ва аҳолӣ бояд дар тарбияи насли бофарҳангу босавод ва огоҳу масъулиятшинос, тарғиби тарзи ҳаёти солим байни ҷомеа ва иштироки варзишгарон дар мусобиқаҳои сатҳи ҷаҳонӣ ва иҷроиши нақшаҳои ба тасвибрасида пайваста чораҳо андешида шаванд.
Дар интиҳои ҷаласаи сайёри Ҳайати мушовара, ки дар шаҳри Леваканти вилояти Хатлон доир шуд, вобаста ба масъалаҳои баррасишуда қарорҳои дахлдор қабул гардид.
МАРКАЗИ ТАҲЛИЛ ВА ИТТИЛООТИ КУМИТА
