Дар доираи нақша – чорабиниҳои Кумитаи кор бо ҷавонон ва варзиши назди Ҳукумати Ҷумҳурии Тоҷикистон давоми рӯзҳои 11 – ум ва 12 уми феврали соли 2025 дар маҷмааи сайёҳиву лижаронии Сафед-дара, воқеъ дар ноҳияи Варзоб таҳти унвони “Нақши блогерон дар рушди ҷомеа, пешбурди фарҳанг ва арзишҳои миллӣ” Форуми дуюми блогерони ҷавони Тоҷикистон баргузор гардид, ки дар он зиёда аз 140 нафар блогерон, намояндагони ВАО ва масъулини чанде аз идораҳои давлатӣ иштирок намуданд.
Нахуст, то лаҳзаи кушодашавии расмии Форум, ҳайати иштирокчиён субҳи 11 – уми феврали соли равон дар саҳни Кумитаи кор бо ҷавонон ва варзиши кишвар гирд омада, тавассути микроавтобусҳо ба самти маҷмааи сайёҳиву лижаронии Сафед-дара сафарбар гардиданд.
Барномаи Форуми мазкур дар доири мавзуву масъалаҳои гуногун ба сессияву мастер – классҳо тақсим гардида, ҳар як қисми барномаи Форум мутобиқи нақша давоми ду рӯз хотирмону самарабахш доир гардид.
Чорабинӣ таҳти раёсати Раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон доир шуда, дар он намояндагони як қатор вазорату идораҳо ва роҳбарияти Ассотсиатсияи блогерони Тоҷикистон иштирок ва суханронӣ намуданд.
Форум ҳамчун як платформаи муҳим барои рушди фазои рақамӣ, баланд бардоштани маърифати иттилоотӣ ва таҳкими ҳувияти миллӣ тавассути ВАО-и рақамӣ нақши бориз дорад.
Ҳадафи асосии он мусоидат ба сиёсати давлатии иттилоотӣ, густариши ҳамкорӣ байни блогерон ва ниҳодҳои давлатӣ, инчунин, истифодаи самараноки шабакаҳои иҷтимоӣ барои рушди ҷомеа мебошад.
Роҳбарияти Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар мавзуи истифодаи дурусти шабакаҳои иҷтимоӣ-кафили амнияти иттилоотӣ маъруза намуда, нақши ҷавононро дар шабакаҳои иҷтимоӣ баланд арзёбӣ намуданд.
Дар идома сиёсатшиносону коршиносони мамлакат сухан гуфта, ҷавононро ба таблиғи дурусти манфиатҳои милливу давлатдорӣ даъват намуданд.
Чорабинии мазкур бо саволу ҷавоб ва мубоҳисаҳои блогерону фаъолони шабакаҳои иҷтимоӣ бобати истифодаи дурусти шабакаҳои иҷтимоӣ ба манфиати миллӣ анҷом ёфт.
Сипас, барои иштирок дар Форум ба иштирокчиён сертификат супорида шуда, нимаи дуюми рӯзи 12 – уми феврали соли 2024 баъд ҷамъбасти чорабинӣ тариқи микроавтобусҳо ҳайати иштирокчиёни Форуми дуюми блогерони ҷавони Тоҷикистон ба шаҳри Душанбе баргаштанд.
Маркази таҳлил ва иттилооти Кумита
