Дар доираи барномаи Форуми минтақавии Шӯрои олимпии Осиё ва Ҳамбастагии олимпӣ барои кумитаҳои миллии олимпии Осиёи марказӣ ва Ғарб ҳайати иштирокчиёни Форум аз 22 кишвари олам сайри мавзеъҳои фарҳангиву сайёҳии пойтахти кишвар шаҳри Душанбе намуда, дар доираи он аз иншооти боҳашамату зебои пойтахт Маҷмааи “Кохи Наврӯз”, ки дар он тамоми унсурҳои миллии бинокории шарқиёна таҷассум ёфтааст, боздид намуданд.
Зимни боздид меҳмононро ҳайати расмии Ҷумҳурии Тоҷикистон таҳти раёсати ноиби аввали Кумитаи миллии олимпии Тоҷикистон ва гурӯҳи ҷавонони ихтиёрӣ (волонтёрон) роҳнамоӣ намуданд.
Дар ин бинои боҳашамат таваҷҷуҳи меҳмононро кандакориҳо дар чӯб, мусаввараҳо, қандилҳои зебову диққатҷалбкунанда ва дигар шоҳкориҳои меъморӣ, ки таърих, урфу одат, расму оин ва маданияту фарҳанги волои миллати тамаддунофари тоҷикро ифода мекунанд, ба худ ҷалб намуд.
Маркази таҳлил ва иттилооти Кумита
