Нимаи якуми рӯзи 5 – уми ноябри соли 2024 дар доираи нақша – чорабиниҳои Кумитаи кор бо ҷавонон ва варзиши назди Ҳукумати Ҷумҳурии Тоҷикистон ҷиҳати сазовор истиқбол гирифтани 30 солагии Рӯзи Конститутсияи Ҷумҳурии Тоҷикистон таҳти унвони “Нақши Конститутсия дар таҳкими санадҳои меъёрӣ ҳуқуқии соҳаи варзиш” конференсияи назариявӣ – амалӣ баргузор гардид.
Чорабинӣ таҳти раёсати Зулфиқор Гулаҳмадзода – Раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар бинои Маркази миллии патенту иттилоот роҳандозӣ гардида, дар он масъулину роҳбарони соҳаи варзиш, собиқадорон ва мураббиёну варзишгарон иштирок намуда, намояндагони татбиқкунандаи низоми қонунгузории кишвар маърӯзаронӣ намуданд.
Раиси Кумита масъулину собиқадорони соҳаи варзиши кишварро бо ин санаи фархунда 30 – солагии Рӯзи қабули Конститутсияи Ҷумҳурии Тоҷикистон самимона шодбош гуфта, ироа намуданд, ки вақте сухан дар бараи Конститутсия меравад, мо ҳатман ҳомӣ ва тарроҳи ин номаи бахту саодати миллат Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон, муҳтарам Эмомолӣ Раҳмонро пеши ру меоварем, зеро Конститутсияи Ҷумҳурии Тоҷикистон нишонаи ҷомаи амал пӯшидани орзуи арзишҳои фарҳангӣ буда, маҳз дар натиҷаи сиёсати хирадмандона ва оқилонаи Президенти мамлакати мо ба амал бароварда шуд. Конститутсияи Ҷумҳурии Тоҷикистон аз дастовардҳои бузурги мардуми тоҷик мебошад, ки он заминаи ҳуқуқии бунёди давлати озодпарвару соҳибихтиёр, ифодаи ормонҳо, ҳимояи ҳадафу манфиатҳои миллӣ, осори таърихӣ ва фархангиро фароҳам овард.
Баъд аз ҷамъбасти маърузаву музокираҳо ба чанд нафар фаъолони соҳаи варзиш сипосномаи Кумита ва шаҳодатномаи устоди варзиш супорида шуд.
Маркази таҳлил ва иттилооти Кумита
