Санаи 05.01.2024 дар яке мавзеъҳои сайёҳиву истироҳатии кишвар Маҷмааи лижаронии “Сафед-Дара” дар доираи нақша – чорабиниҳои Кумитаи кор бо ҷавонон ва варзиши назди Ҳукумати Ҷумҳурии Тоҷикистон оид ба натиҷагирӣ аз фаъолияти зерсохторҳои Кумита дар давоми соли 2024 ҷаласаи ҳисоботии Муассисаи давлатии “Мактаби ҷумҳуриявии маҳорати олии варзишӣ оид ба куҳнавардӣ, шухпаймоӣ ва лижаронии кӯҳӣ” баргузор гардид.
Ҷаласа таҳти раёсати Зулфиқор Гулаҳмадзода – Раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон доир гардида, дар он раиси Федератсияи лижаронии Тоҷикистон – Абдуллозода Муҳамадшо, муовини раиси Кумита сарпарасти соҳа – Шокирзода Муҳаммадтолиб, директори муассиса Ғафорзода Билол, варзишгарон ва ҳайати кормандону масъулини Муассисаи давлатии “Мактаби ҷумҳуриявии маҳорати олии варзишӣ оид ба куҳнавардӣ, шухпаймоӣ ва лижаронии кӯҳӣ” ширкат варзиданд.
Нахуст, директори Муассисаи давлатии “Мактаби ҷумҳуриявии маҳорати олии варзишӣ оид ба куҳнавардӣ, шухпаймоӣ ва лижаронии кӯҳӣ” ҳисоботи муассисаи мазкурро зимни фаъолият дар соли 2024 ироа намуда дастоварду мушкилии муассисаро давоми як сол шарҳ дод.
Зимни ҳисобот дарҷ гардид, ки Муассиса аз рӯи се намуди варзиш лижаронии кӯҳӣ, шухпаймоӣ ва куҳнавардӣ фаъолият менамояд, ки намудҳои лижаронии кӯҳӣ ва шухпаймоӣ варзиши олимпӣ буда, намуди куҳнавардӣ ғайриолимпӣ мебошад.
Дар Муассиса айни ҳол 17 гурӯҳи варзишӣ фаъолият дорад, ки дар онҳо шумораи умумии дастпарварон 142 нафарро ташкил менамояд.
Ҳисоботи Муассиса зимни фаъолият дар соли 2024 қаноатбахш арзёбӣ гардида, таъкид шуд, ки дар соли навбати барои баланд бардоштани нишондод ва омода намудани мутахассисони касбӣ дар соҳаи варзиши мамлакат аз ҳозир ҷораҷӯи намуда, нақшаву барномаҳои нав рӯи кор оранд.
Раиси Кумита таъкид намуданд, ки роҳбарият ва масъулини муассисаро мебояд, ки минбаъд якҷо бо Кумита ва федератсияҳои варзишии мамлакат корбарӣ намуда, таъмини иштироки варзишгаронро дар чемпионатҳои ҷаҳон, Осиё ва мусобиқаҳои байналмилалии тақвимию рейтингӣ ба роҳ монда, барои ба даст овардани роҳхати Бозиҳои олимпии Лос Анҷелес 2028 аз ҳозир омодагии ҷиддӣ дида, тадбирҳои заруриро роҳандозӣ намоянд.
Ҳамзамон вобаста ба фаъолияти Муассиса дар соли 2025 як зумра дастуру супоришҳои мушаххас дода шуд.
Дар фарҷом ба якқатор мураббиёну варзишгарон лижаҳои варзишӣ эҳдо гардид.
Маркази таҳлил ва иттилооти Кумита
