3 октябр бахшида ба Рӯзи забони давлатӣ ва Рӯзи омӯзгорон дар Донишкадаи тарбияи ҷисмонии Тоҷикистон ба номи Сайидмуъмин Раҳимов таҳти унвони “Забон-пояи устувори давлат” ҳамоиши илмӣ – адабӣ баргузор гардид.
Ҳамоиши мазкур таҳти раёсати Абдуллозода Муҳаммадшо Мирбозхон – Ректори Донишкадаи тарбияи ҷисмонии Тоҷикистон ба номи Сайидмуъмин Раҳимов, Муҳаммадтолиб Шокирзода – муовини Раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Лутфия Абдухолиқзода – муовини Вазири маориф ва илми Ҷумҳурии Тоҷикистон ва Дилшод Назаров – ноиби Президенти Кумитаи миллии олимпии Тоҷикистон баргузор гардида, дар он собиқадорон ва омӯзгорону донишҷӯёни Донишкада иштирок намуданд.
Пеш аз оғози чорабинӣ ба меҳмонон дастовардҳои варзишии донишҷӯён намоиш дода шуда, сипас дар саҳни Донишкада аз ҷониби донишҷӯён барномаи варзишӣ ва ҳарбӣ ватандӯстӣ пешкаш карда шуд, ки фазои чорабиниро рангину ҷазоб гардонид.
Зимни ҳамоиш дарҷ гардид, ки воқеъан омӯзгор, муаллим ин тарбиятгар, ҳидоятгар ва мушкилкушои ҳар як инсон аст. Омӯзгор чароғи равшанест, ки дар зулматҳои роҳи ҳаёт равшанӣ намуда, ҳар як наврасу ҷавонро ба қуллаҳои мурод мерасонад. Маҳз омӯзгор аст, ки инсонро бо донишу хирадаш аз доираи ҷаҳолат, нодонӣ ва хурофот мераҳонад.
Муовини Раиси Кумита ҳозиринро ба ифтихори ду иди ба ҳам тавъам Рӯзи забони давлатӣ ва Рӯзи омӯзгорон аз Раиси Кумита самимона табрику муборакбод намуда, ироа намуданд, ки дар пайравӣ аз ташаббусҳои маорифпарваронаи Пешвои муаззами миллат Кумитаи кор бо ҷавонон ва варзиши назди Ҳукумати Ҷумҳурии Тоҷикистон бо мақсади баланд бардоштани мақому манзалати омӯзгор, сифати таълиму тарбия ва таҳкими заминаҳои моддиву техникӣ дар Донишкада, Колеҷ, Мактабинтернат ва муассисаву марказҳои тайёриву таълимии варзиши кишвар, бунёди иншооти соҳа, инчунин беҳбудии шароити моддиву маънавии муассисаҳои тайёрии варзишӣ тадбирҳои муассирро роҳандозӣ мекунад.
Таъкид шуд, ки Донишкадаи тарбияи ҷисмонии Тоҷикистон ба номи Саидмуъмин Раҳимов ягона муассисаи олии кишвар маҳсуб меёбад, ки дар тарбияи кадрҳои баландихтисоси соҳаи тарбияи ҷисмонӣ ва варзиш солҳои охир нақши боризе гузошта, хатмкардагони ин боргоҳи муқаддас дар баробари парчамбардориву паҳлавонӣ инчунин ба ҳайси роҳбар, мураббии шоистаи варзиш ва омӯзгори соҳаи тарбияи ҷисмонӣ ва варзиши кишвар фаъолият намуда, дар рушду ташаккулёбии варзиши касбии мамлакат саҳмгузор буда, шарафи варзиши тоҷикро ба ҷаҳониён муаррифӣ менамоянд.
Дар фарҷмои чорабинӣ як қатор омӯзгорони соҳибтаҷрибаи ин боргоҳ бо Сипосномаи Кумита ва тӯҳфаҳои арзишманд қадршиносӣ гардиданд.
Маркази таҳлил ва иттилооти Дастгоҳи марказии Кумита
