Имрӯз Раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон – Зулфиқор Гулаҳмадзода бо Сафири Ҷумҳурии Исломии Эрон дар Тоҷикистон – Алиризо Ҳақиқиён мулоқот намуд.
Дар оғози мулоқот Раиси Кумита, Сафири Ҷумҳурии Исломии Эрон дар Тоҷикистон ва ҳайати ҳамроҳи онро ба истиқболи ҷашни байналмилалии Наврӯз шодбош гуфта, масъалаҳои густариш додани ҳамкориҳо дар самти ҷавонон ва варзиш, рушди муносибатҳои дуҷонибаи Тоҷикистон ва Эрон, иқдомҳои роҳбарияти олии ду давлат дар таҳкими робитаҳои гуногунҷанбаи ду мамлакат, аз ҷумла дар чорчӯби ташкилотҳои байналмилалӣ ва минтақавӣ, ки тарафҳо узвият доранд, инчунин моҳияти сиёсати «дарҳои боз»-и Ҳукумати Тоҷикистон ва нақши сиёсати давлатии ҷавонон ва варзишро дар таҳкими муносибатҳои байнидавлатӣ шарҳ доданд.
Дар зимн иброз шуд, ки бо шарофати сиёсати дарҳои боз эълон кардаи Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон дар зарфи 32 соли соҳибистқлолӣ кишвари мо тавонист бо 174 кишвари олам ва зиёда аз 50 ташкилотҳои бонуфузи байналмилалӣ муносибатҳои хуби ҳамкорӣ ба роҳ монад.
Аз он ҷумла таъкид гардид, ки бароямон боиси ифтихору сарфарозӣ ҳаст, ки бо ҷониби Ҷумҳурии Исломии Эрон дар самти кор бо ҷавонон ва варзиш созишномаҳои аллакай ба имзорасида дорем.
Дар поёни сухан Зулфиқор Гулаҳмадзода дарҷ намуданд, ки мо имсол Форуми ҷавонони Тоҷикистон ва Эронро мехоҳем дар Тоҷикистон баргузор намоем ва ҳайати ҷавонони Ҷумҳурии Исломии Эронро барои меҳмондорӣ ва иштирок дар Форуми мазкур даъват менамоем.
Сараввал ҷаноби Сафир ҷиҳати пазироии гарму самимӣ изҳори сипос намуда, иброз доштанд, ки мо омодаем то ҷавонони Эрон барои анҷом додани сафари омӯзишӣ ба кишвари Шумо сафар намоянд.
Ҳамзамон ҷиҳати роҳандозӣ намудани ҳамкориҳои судманди дуҷонибаро бо Кумитаи кор бо ҷавонон ва варзиши назди Ҳукумати Ҷумҳурии Тоҷикистон ва имзои созишномаҳои сифатан навро дар доираи варзиши футбол, гуштини миллӣ ва намуди варзиши Зурхонаро иброз дошт. Зимнан таъкид дошт, ки мо бояд ҳамкориҳои худро дар ҳамаи самтҳои афзалиятноки кор бо ҷавонон ва эҳёи дигар намуди варзишҳои анъанавии миллӣ ба роҳ монем.
Инчунин ҷаноби Сафир қайд намуд, ки Президенти Ҷумҳурии Исломии Эрон якумин ташрифи хориҷии худро аз Ҷумҳурии Тоҷикистон оғоз намуд, ки ин аз дустиву бародарии роҳбарони ду кишвар шаҳодат медиҳад.
Мулоқоти мазкур бо ҳусни тафоҳум анҷом ёфт.
Маркази таҳлил ва иттилооти Дастгоҳи марказии Кумитаи кор бо ҷавонон ва варзиши назди Ҳукумати Ҷумҳурии Тоҷикистон.
