Муштзани соҳибноми тоҷик, иштирокчии Бозиҳои олимпии Токио -2020 ва Париж -2024 Баҳодур Усмонов (PRO: 9-0, 3 КО; IBA: 2-0) рӯзи 15-уми март дар мусобиқаи RCC Boxing Promotions дар Екатеринбурги Русия ҳунарнамоӣ мекунад. Дар ин бора Федератсияи бокси Тоҷикистон хабар додааст.
Усмонов дар вазни то 63,5 кг бо муштзани ӯзбек Нодирбек Сойибов (9-0) сабқат мекунад. Охирин рақобати Баҳодур моҳи ноябри соли 2024 дар марҳилаи чаҳорякниҳоии мусобиқаи IBA Kunlun Fight World Cup дар Пекин бо муштзани чинӣ, собиқ қаҳрамони Осиё оид ба WBC Ванг ЛеКуан (PRO: 8-3, 5 КО; IBA: 0-1) буд. Рақобати муштзанон 6 раунд идома кард ва бо қарори якдилонаи доварон пирӯзӣ ба муштзани мо Баҳодур Усмонов дода шуд. Сойибов охирин муборизаи худро моҳи декабри соли 2024 бо Хотамбек Аскарови ҳамватанаш дар Андиҷон доир карда, дастболо шуда буд.
Ёдовар мешавем, ки Баҳодур Усмонов узви дастаи мунтахаби миллии бокси Тоҷикистон, иштирокчии Бозиҳои олимпии соли 2020, барандаи медали биринҷии Чемпионати ҷаҳон (2023), Чемпиони Осиё (2019), дорандаи медали биринҷии дукаратаи Чемпионати Осиё (2021, 2022), қаҳрамони чандинкаратаи Тоҷикистон мебошад.
ТВ “Варзиш”
